رواية زهرتي الفصل الثاني 2 بقلم اسراء ابراهيم

 

 رواية زهرتي الفصل الثاني

شالت زهرة الطرحة من علي وشها وبصت لبدر اللي كان باصص ليها بتركيز وكأنه بيكتشف ملامحها واتفاجأ بيها بتقوله :

انت يا بدر متتعابش ابدا ،، انا اتچوزتك وانا خابرة انك زين رچالة النجع كله ،، وصدجني اني مهيفرجش معايا اي حاچة 

بصلها بدر شوية واتكلم بهدوء وهو بيقرب منها :

يعني اني موافجة انك تعيشي معايا واني مبخلفش ،، كيف ده ،، انتي خابرة انك مش هتبجي ام ابدا يا زهرة 

بصتله زهرة لاول مرة بتركيز في عنيه وهو مقرب منها وردت بثقة حسها هو في صوتها :

موافجة وراضية يا بدر ،، المهم انك انت اللي توافج  

اتوتر بدر ودور وشه وهو بيقولها بجدية :

اوافج علي ايه ،،مش فاهم عاد 

مشيت زهرة ووقف قدامه عشان تكون عنيها في عنيه تاني وجاوبت بهدوء :

تكون موافج انك تديني فرصة ،، تكون راضي بيا وتشوفني يا بدر ،، وده مش هيحصل غير لما تخرج شمس من جلبك 

اتوتر بدر وفي نفس الوقت استغرب كلام زهرة ،، كان بيسأل نفسه ليه بتقوله كدة رغم انها المفروض متجوزاه بالاتفاق مع اخته عشان ترد سمعته مش اكتر ،، اخيرا اتكلم بدر وقالها بتجاهل وهو بيسيبها ويروح الحمام :

انتي ملكيش صالح اشيلها من جلبي او لا ،،انتي ليكي المعاملة الزينة واني اتجي الله فيكي ،، اكتر من اكده موعدكيش واظن ده كان اتفاجنا من الاول 

اتتهدت زهرة بحزن وخيبة امل كبيرة بعد ما كانت متحمسة اوي وواثقة انها هتقدر تنسيه شمس وانه هيحبها اكتر بكتير منها بس للاسف كلامه دلوقتي موت الامل جواها فردت بهدوء ودموعها محبوسة في عنيها :

تمام يا بدر ،، واني كيف ما جولتلك ،، راضية ابجي زوجة ليك بس مسكنش جلبك ،، 

اتنهد بدر بضيق وهوومديها ضهره وفتح باب الحمام ودخل وهبد الباب وراه وزهرة وقتها دموعها اتحررت وهي بتتنفس بصعوبة زي عادتها لما بتكون مخنوقة ومضايقة من حاجة 

…………………..

يا مري ياما حاسة اني هيچرالي حاچة 

قالت كدة شمس وهي ماسكة دماغها وقاعدة عالكنبة وجمبيها جليلة امها اللي كانت بصالها بحيرة وردت عليها وقالتلها :

اني مش خابرة يا بتي ،، ايه اللي عاملاه في روحك ده ،، مش انتي اللي هملتيه وطلبتي الطلاج ،، كيف دلوك هتتچنني عشان هو اتچوز ،، فهميني 

ردت شمس وهي بتغمض عنيها بغضب كل ما تفتكر زهرة :

والنبي ياما مفايا تبكتي فيا كل شوية ،، اني خابرة اني انا اللي اتنيلت وهملته بس مكنتش متخيلة انه هيتچوز عدوتي ،، زهرة دي اني بطيج العما ولا اطيجهاش ،، وكمان انتي مشوفتيش كانت بتتحدت معايا ازاي لما روحتيلها ،،كانها شمتانة فيا ياما ،، ااه ما اني اللي غبية ،، جولت انها لا يمكن هتبصله بعد ما اني اتچوزته 

كانت جليلة مبرقة وهي بتسمع كلام شمس بنتها وبعد ما خلصت كلامها ردت هي بصدمة وغضب :

يا مري،، هو انتي ساعت ما هملتيني اكده كنت رايحالها ،، يا خيبتك في بتك يا جليلة ،، رايحالها برچلك عشان تشمتيها فيكي يا حزينة ،، ما ليها حج تعمل اكتر من اكده 

يوووه ياما 

قالتها شمس بعصبية وهي بتقوم من مكانها وكملت كلامها وهي بتقرب من الشباك وببص منه :

اني لما هملت بدر كان بكيفي عشان اأدبه عشان لما طلبت منه يكتبلي الدار الكببرة باسمي رفض وجالي ده دار امي واختي برضك ومهينفعش اكتبهولك باسمك واني لما وجفت جصاده جالي هكتبلك دار غيره بس اني بجي لجيت ان مبدهاش وكفايا اكده وياه ،،اصله فجر مهواش وش نعمة ،، لكن تيچي بت طاهرة وتاخده وتفتكر انها علمت عليا ،، ده بعنيها 

كانت بتسمع جليلة كلام شمس ومش مصدقة قد هي طماعة ومش بيملي عنيها حاجة فردت عليها بتلقائية وهي بتبصلها بسخرية :

وبتجولي ان بدر وش فجر اومال انتي ايه يا بتي ،، الراچل كان بيتمنالك الرضا ترضي وجالك اكتبلك دار لحالك بس انتي كيف يعني يكتبلك دار غير دار امه وابوه تجومي تطلجي منه وتفضحيه في البلد ،، اااخ يا خسارة تربيتي فيكي يا شمس 

شمس لوت وشها وبصت بعيد بلا مبالاه وكان كل تفكيرها انها ازاي ترجع بدر وتخليه هو اللي يطلب منها ترجعله وده عشان تكيد زهرة بس وتعلم عليها 

ط

………………….

تاني يوم صحيت زهرة بس ملقتش بدر جمبها ،،اتنهدت بحزن وقامت غيرت هدومها ونزلت وقابلتها نوارة اللي زغرطت اول ما شافتها وخدتها بالحض*ن وبادلتها الحض*ن زهرة وبعدين قربت من فتحيه ام بدر ووطت حبت علي ايديها وهي بتقول بحب :

صباح الخير يا عمة 

فتحية بصت لنوارة وابتسمت وكأنها بتقولها ان شمس عمرها ما عملتها وفهمت نوارة كدة فابستمت وردت بصوت عالي :

مش جولتلك ياما ان زهرة غير ،،دي زينة البنتة ،، يلا هروح اني احضر الغدا 

سبقتها زهرة وردت عليها وهي بتلحقها قبل ما تمشي وقالتلها بود :

وه لا طبعا خليكي،، انتي حبلة وغلط عليكي الوجفة كتير ،، اني رايدة اطبخ بيدي عشان تعرفو اني زينة في الطبيخ ولا لاه 

ابتسمت نوارة وردت بحب وهي بتقعد :

والله كل حاچة من يدك تبجي زينة يا مرت اخوي ،،كفايا انك هتعمليه بنفسك 

سابتهم زهرة ودخلت المطبخ ووقتها اتكلمت فتحية بضيق :

طب والله البنتة باين عليها زينة،، مخبراش اخوكي والعمايل اللي بيعملها دي ،،كيف يهمل عروستة ليله صباحيتها ويخرج ،،بجي بالزمة ده ينفع 

اتنهدت نوارة وردت بضيق من تصرفات بدر اخوها :

اما يچي ياما لينا حديت معاه ،،اكده مينفعش واصل 

……………    

عدي كام ساعة كانت فيهم زهرة واقفة في المطبخ وحتي بعد ما دخلتلها نوارة عشان تساعدها بس هي رفضت وصممت تعمل كل حاجة لوحدها وده عشان خاطر بدر هي نفسها ياكل من ايديها ،،دي كانت امنية حياتها ،، برة دخل بدر من الباب واول ما شافته نوارة قامت بغضب وقربت منه :

بجي اكده يا بدر ،،مكنش العشم يا ولد ابوي ،،بجي هي دي الاصول ،،تهمل عروستك لحالها ليلة صباحيتها يا بدر    

 بدر اتنهد بضيق ورد بجدية وهو بيقعد عالكرسي :

اصل كان في شغل كتير مستعچل ومكنش ينفع اهمله 

ردت فتحيه وهي بتبص لبدر بعتاب :

بس البنتة مالهاش ذنب يا ولدي ،، وبعدين حديت الناس لو ملوش عاذة عندك زمان يبجي لازمن تخاف منه وتعمل حسابه دلوك عشان مرتك 

اتنهد بدر بحيرة وتأنيب ضمير وانتبه لصوت نوارة وهي بتقوله بزعل :

البنتة واجفة من صباحة ربنا في المطبخ ومرضيتش تخليني اساعدها ،، ياريت تبجي تراضيها بكلمتين 

قام بدر وهو بيرد علي نوارة بابتسامة:

من عيوني يا خيتي ،،بس متزعليش مني 

سابهم بدر بعد ما خلص كلامه ودخل المطبخ لزهرة اللي كانت واقفة حاطة ايديها في ضهرها من التعب عشان وقفت كتير وفي نفس الوقت بتقلب الطبيخ عالنا*ر وسرحانة لحد ما انتبهت لصوته وراها وهو بيقولها بابتسامة :

اني شامم ريحة طبيخ حلوة جوي 

اتخضت زهرة اول ما سمعت صوت بدر ولفت وراها بسرعة بس ايد بدر كانت محاوطاها احسن تقرب من النار وضمها عليه وهو بيقولها بلهفة :

حاسبي النا*ر يا زهرة 

كانت زهرة مش مركزة في حاجة غير انها بين ايدين بدر وانه قريب منها اوي كدة فردت بحزن :

خايف عليا اياك 

رد بدر وهو مركز في عنيها وهي قريبة منه :

طبعا مش مرتي ؟

اتنهدت بحزن زهرة وقالتله وهي بتبص بعيد عن عنيه بزعل :

ولما اني مرتك هملتني ليه ومشيت يوم صباحيتنا ولا عشان مفارجاش معاك يا بدر 

قالت كدة زهرة وهي بتبعد ايد بدر عنها وهو لقي نفسه بيمسك ايديها وبيقولها بندم :

اسف يا ست البنتة ،، بس غصب عني ،، كان مشوار شغل ضروري جوي 

ابتسمت زهرة وهي باصة علي ايد بدر اللي ماسكة ايديها :

واني خلاص سامحتك يا بدر ،، وهسامحك اكتر لما تدوق وكلي وتجولي حلو ولا عفش 

ضحك بدر ضحكة رنت في قلب زهرة فحطت ايديها علي قلبها وسمعته وهو بيقولها :

لا اني متوكد انه هيطلع زين جوي ،،عشان من يدك 

ابتسمت زهرة بفرحة لان بدر بدأ يتغير معاها وحست ان الامل رجعلها من جديد وهو كان باصصلها وجواه مشاعر متلخبطة ومكنش عارف هو حاسس بايه من ناحية زهرة بس اللي متأكد منه انه فرحان عشان شايف ابتسامتها 

…………………….

كانو قاعدين بياكلو كلهم وقاعدة زهرة جمب بدر وبصاله بتوهان وشافتها نوارة وابتسمت علي شكلها وبعدين اتكلمت بخبث :

تعرف يا خوي ،، انا بجالي زمن مكلتش وكل بالطعامة دي ،، شكلها زهرة كانت عاملاه بمزاج عالي جوي اكمنك اللي هتاكل منه 

بصتلها زهرة بخجل وبصت في طبقها واتفاجأت بصوت بدر اللي بيقول بتأكيد :

طبعا مش مرتي ،،لازمن يطلع وكلها زين ،، تسلم يدك يا زهرتي 

بصت زهرة لبدر وابتسمت بفرحة من كلامه وهو بصلها وابتسم ،،كأن كلامه اعتذار ليها علي معاملته امبارح ومن عنيها فهم انها قبلت اعتذاره بس قط*ع نظراتهم دخول شمس اللي اتفاجأت بيها نوارة وزهرة وسمعوها بتتكلم بابتسامة وهي داخلة عليهم :

متچمعين عند النبي ان شاء الله ،، كيفك يا مرت عمي 

بدر اتصدم لما شاف شمس لانه مكنش متخيل انها ممكن تيجي وراه هنا وانتبه لامه اللي ردت ببرود :

زينة يا بت جليلة ،، چيتي في وجتك تعالي اتغدي ويانا ،، ده مرت ولدي عاملة وكل زين جوي 

اتغاظت شمس وبصت لزهرة بغضب وردت ببرود وهي بتقرب منهم :

لا ماني سبجتكم ،، هو انت مجولتلهومش يا بدر انك دوقت وكلي جبل ما تيچي اهنه 

اتصدم الكل خصوصا زهرة اللي بصلها بدر بسرعة اول ما قالت شمس كدة وهي بصتله بخزلان وعتاب وسابتهم وقامت بس قبل ما تمشي كان بدر مسك ايديها وكمل كلامه بسرعة عشان يوضح كلام شمس :

ططب كملي وجولي ان عمي اللي شيعلي في موضوع ضروري وبعدين اتفاجأت انه رايدني عشان اتغدي معاكم ولما رفضت حلف عليا ولا ايه يا شمس 

شمس اتوترت وبصت لبدر بعتاب وهو اتجاهلها وبص لزهرة اللي كانت واقفة باردة وباصة بعيد عنهم وهو قام وقرب منها وحاوطها بايديه وقال بجدية للكل :

انا طالع اني ومرتي فوج ياما وابجو اتعشو انتو عشان مش هننزل انهاردة خالص 

ابتسمت نوارة بفرحة من موقف بدر رغم انها كانت مستغربة موقفه وكانت متوقعة انه يضعف لانها عارفة انه لسة بيحب شمس بس خلف توقعها ،، اول ما بدر طلع بصت نوارة لشمس وقالتلها بابتسامة :

خلاص اللي چاية عشانه محصلش واداكي الصابونة ،، هتجعدي بجي ولا ناوية تخلي عنديكي كرامة وتمشي 

بصتلها شمس بحد*ة وردت بسخرية عليها قبل ما تمشي :

متفرحيش جوي يا نوارة ،،عشان اللي انتي خايفة منه هيحصل وجريب جوي ،،وزي ما سبت يدر هرجعه ليا وبكرة تجولي بت جليلة جالتها 

اوووف ،، بت بچحة وعنيها مكشوفة صحيح 

قالتها نوارة بغضب بعد ما مشيت شمس من قدامها وسرحت في كلامها وكانت خايفة احسن بدر فعلا يضعف ويرجعها 

……………….

فوق كان بدر قاعد قدام زهرة وباصص ليها بحزن بعد ما طلبت منه يطلقها وبعد سكوت فترة رد بجدية :

اسمعيني زين يا بت الناس ،، انتي من الاول كنتي خابرة كل حاچة ،، نوارة جالتلي انها خبرتك بكل حاچة واني لساتي بحب شمس وانك موافجة انك تتچوزيني وتكملي معايا التمسليىة دي عشان اخليها تندم علي اللي عملته و

زهرة قلبها وج*عها اول ما اعترف قدامها انه لسة بيحب بنت عمه ولقت نفسها من غير ما تحس بتتكلم بعصبية وغضب وغيرة عمتها وخليتها تطلع كل اللي في قلبها :

اتچوزتني عشان تخليها تندم ،،لا يا بدر ده عشان تكسر*ها كيف ما كس*رتك وسط الناس اوعاك تنسي ده ،، مسألتش نفسك ليه وافجت ابجي صورة بس في حياتك ،، مسألتش نفسك ليه اني اضحي بحياتي واني اتچوز راچل كان متچوز جبل سابج وكمان خابرة انه لسة بيحبها ،، اكيد مش عشان هبلة ولا غب*ية ولا عشان طمعانة فيك يا ولد شيخ البلد ،، انت حتي محاولتش تعرف ولا تسألني ليه وافجتي ،،كانك مش رايد ولا مش همك تعرف ،،بس اني بجي هجولك ،، هجولك يا بدر وبعد اكده هعمل اللي اتچوزتني عشانه وبعدين امشي ومعدتش تشوف وشي تاني ،، شمس بت عمك وطليجتك اللي انت لساتك بتحبها ومش شايف غيرها مهياش عاشجاك ولا انت في حساباتها من اصله ،، في الاصل اتچوزتك عِند فيا ،، عشان تكيدني وتاخد مني كل حاچة بحبها ،، اتچوزتك بعد ما عرفت اني عاشجاك وسمعتني وانا بتحدت مع نوارة خيتك ،، انت كنت مچرد بس سبب تعاستي بالنسبالها فعشان اكده اتچوزتك 

كان بدر بيسمع كلام زهرة وهو مصدوم ومش متخيل ان فعلا ممكن تكون شمس اتجوزته من خمس سنين عِند في زهرة لما عرفت انها بتحبه ،، انتبه بدر لصوت زهرة اللي مسحت دموعها وهي بتقوله بحزن :

مكنتش هجولك اي حاچة من دي ،، بس انت وچ*عتني يا بدر ،، رغم كل حاچة عملتها عشانك بس انت مصمم تچر*حني ،، انا اسفة لو كنت جولت حديت مينفعش يتجال بس دي الحجيجة حتي اسأل نوارة 

بدر مردش علي زهرة وسابها وقام بغضب وخرج وهي فضلت تعيط بحرقة وهي بتلع*ن نفسها عشان اتسرعت وقالتله الحقيقة 

……………………

كانت نازله شمس وهي مش مصدقة ان بدر تحت وعايزها وافتكرت انه جاي يطيب خاطرها بعد اللي حصل في البيت عنده   

فكانت نازله فرحانة وبتجري واول ما وصلت عنده اتفاجأت بيه بيضر*بها بالقل*م فبصتله بصدمة وغضب وهي حاطة ايديها علي وشها :

انت بتضر*وبني يا بدر ،، بتمد يدك عليا ،، اني عملت ايه عشان تضر*وبني 

بصلها بدر بحد*ة واتكلم بهدوء عكس اللي جواه وقالها وهو بيشاور بايديه:

هو سؤال واحد يا شمس وتردي عليه ويمين بالله لو شميت انك بتكدبي لاخ*لص عليكي بيدي 

خافت شمس من تهد*يد بدر ونبرة صوته القوية وانتبهت ليه وهو بيسألها بجدية :

صوح وافجتي تتچوزيني عشان عرفتي ان زهرة عاشجاني ،، وافجتي عشان تكس*ريها مش اكده 

اتوترت شمس وهربت بعنيها بعيد عن عيون بدر وقالتله بتهتهة :

اانت چبت الحديت ده منين ،، زهرة اللي جالتهولك مش اكده 

بدر كان ملاحظ توتر شمس وترددها في الكلام وغمض عنيه بصدمة وهو بيلع*ن غب*اءه ورجع فتح عنيه تاني وبصلها وقالها بحد*ة :

انا لو ندمان فعشان طاوعت جلبي اللي كان لسة عاشجك بعد كل اللي عملتيه جبل سابج ودلوك كر*هت نفسي عشان كنت اعمي ومشوفتش سواد جلبك من زمان عشان عشجي كان عاميني 

قربت شمس بسرعة من بدر وحاولت تمسك ايديه وهي بتتكلم بسرعة :

يا بدر افهمني بس ،، انا كنت عاشجاك جبلها وهي اللي كانت رايدة تخطفك مني بس انت ساعتها حسيت بيا اني وعشجتني 

نفض بدر ايد شمس بعصبية وقر*ف منها واتكلم بهدوء قبل ما يسيبها ويمشي :

اني لو كنت بحس صوح ،،كنت عرفت حجيجتك من الاول وكنت حسيت بالبنتة اللي كانت عاشجاني حتي بعد ما اختارت غيرها 

مشي بدر بعد ما قال كلامه وكانت متابعاه شمس بغيظ وهي بتل*عن من جواها زهرة ومتأكدة انها هي اللي قالت لبدر الحقيقة عشان تخليه يكر*ها وللاسف كسبت وخليته قفل صفحتها للابد 

………………….

عدي كام يوم بعد اللي حصل بين بدر وزهرة وحتي بعد رجوعه ليها وكلامه معاها عن علاقتهم وانهم يدو بعض فرصة بس هي رفضت وفهمته انها مش عايزاه يقول كدة عشان حاسس بشفقة من ناحيتها وانها عايشة معاه بس عشان تنفذ اللي اتفقت عليه بينها وبين نوارة وبمجرد ما الناس تعرف انها حامل منه وكمان شمس تعرف هتمشي ومش هيشوف وشها تاني وبدر مقدرش يتكلم معاها او يمانع ده وساب الايام كفيلة تغير كل حاجة ،، كانت نازلة زهرة عالسلم وهي بتظبط طرحتها واول ما شافتها نوارة شهقت بخضة وقالت بانبهار :

ما شاء الله تبارك الخلاق ،، ايه بت يا زهرة الحلاوة دي عاد ،، اومال مكنتيش بتحطي الحچات دي اهنه ليه ،، مستنيه لما يچيلنا فرح ااياك

ابتسمت زهرة وردت بغرور مصطنع وهي بتقرب من نوارة :

ايوة اني مبحبش الزواق والحچات دي بس بحط في الافراح بس ،، اومال صحيح عمة فتحية 

نوارة ردت بملل وهي بتقعد بتعب وبتسند عالكرسي :

امي حصلتنا علي بيت خالتي وجالت نحصلها سوا بس لما يچي بدر ،،وه اهو چيه اهو 

دخل بدر بسرعة وهو مستعجل وبيبص في ساعته :

معلش اتأخرت كان عندي شغل گتير ،، يلا بسرعة احسن خالي

قط*ع بدر كلامه اما بص لزهرة واتفاجأ بيها حاطة مكياچ اينعم بسيط بس مبين جمالها ورغم ان قلبه دق وكان مركز في تفاصيلها بس الغيرة كلت قلبه وفجأة ملامحه اتغيرت وكشر وهو بيقولها بغضب :

ايه اللي انتي مهبباه ده ،، اتفضلي اطلعي امسحي اللي حطاه في وشك ده يلا

زهرة دموعها اتجمعت في عنيها بسبب صوت بدر وطريقته معاها وانه كسفها قدام اخته نوارة فسابتهم وجريت علي فوق وكانت متابعاها نوارة بحزن وبعد كدة بصت لبدر بغضب :

تصدج بالله انت كيف البجم 

رفع بدر حاجبه بصدمة وبص لنوارة اللي كملت كلامها بحد*ة :

ايوة انت ،، يعني مش مكفيك المعاملة الزفت اللي بتعاملها للبت وهي لسة عروسة وكمان تكس*ر خاطرها وتحرجها جدامي ،،انت ايه ده ،، دي حتي كيف الجمر ،، وبعدين ما اني حاطة اهو اني كمان متحدتش ليه 

اتحرج بدر ورد بتوتر وهو بيبص بعيد :

انتي متچوزة وليكي راچل اينعم مسافر بس برضك انتي في حكمه هو لكن هي مرتي وانا ليا حج اغير عليها

اتنهدت نوارة بحيرة بعد ما فهمت ان بدر غيران علي زهرة زي ما كانت شاكة فقالتله بهدوء :

يبجي تفهمها يا اخوي ،، عرفها انك غيران عليها دي حتي تفرح ،،مش تزعجلها اكده جدامي وتكسفها 

اتنهد بدر بضيق وبعدين ساب نوارة وطلع لزهرة فوق وهو حاسس بتأنيب الضمير 

……………………   

كانت واقفة زهرة قدام المراية وبتمسح المكياچ المخلوط بدموعها بالمنديل اللي في ايديها وهي باصة لنفسها بحزن ،،كان صعبان عليها من بدر اوي ومتعرفش ليه اوقات تحس انه بيحبها واوقات تحس انه بيكر*هها ،، ق*طع سرحانها صوت بدر من وراها وهو باصص ليها في المراية :

ممكن اعرف بتعيطي ليه دلوك ؟

لفت زهرة وبصت لبدر بحزن وردت بزعل وهي بتسيبه وتمشي :

مفيش حاچة ،،مش عملت اللي جولت عليه ،،هملني لحالي بجي 

مسك بدر ايد زهرة ومنعها تعدي من جمبه فبصت هي لايديه ورجعت بصتله فاتكلم هو بندم :

حجك علي جلبي يا زهرتي 

قلب زهرة دق اول ما قال بدر كدة وبصت في عنيه فكمل كلامه بابتسامة وهو بيقرب وشه منها :

اصل انتي كنتي كيف الجمر ليلة تمامه واني لما تخيلت ان ممكن حد يشوفك غيري النا*ر جادت في جلبي 

ابتسمت زهرة غصب عنها واتمنت من جواها ان تكون مشاعره دي حقيقية فقالتله :

بس انت خابر انها جاعدة حريم ،، يعني مفيش رچالة 

قرب بدر اكتر وهمس في ودن زهرة بطريقة خلت قلبها كان هيقف من الفرحة:

ماهو المشكلة اني بتحدت عالحريم ،،ما بالك بجي بالرچالة،، اغزي الشيطان يا زهرتي ،، احسن اموت حد بسببك انهاردة 

ابتسمت زهرة وردت بتهتهة وهي باصة في عيون بدر اللي كان متابع خجلها ومستمتع بيه :

حااضر ،، اانا مسحته اصلا حتي شوف 

ابتسم بدر برضا ومسك ايد زهرة وبا*سها بحنية وبعدين حض*ن بايديه ايديها ونزلو سوا وزهرة مش مصدقة معاملة بدر ليها وكانت حاسة انها بتحلم

…………………

وصل بدر نوارة اخته وزهرة مكان الحريم وبص لنوارة وقالها بتحذير :

متهمليش زهرة ابدا يا نوارة وخدي بالك عليها 

ابتسمت زهرة بخجل ونوارة رفعت حاجبها وردت وهي بتبصلهم هما الاتنين :

نعم ،، هو انا بقيت البادي جارد بتاعكم ولا ايه عاد ،، بس ماشي لاچل عيون زهرة الجمر حاضر ياسي بدر   

بص بدر لزهرة بابتسامة وسابهم ومشي وهي كانت متابعاه بتوهان لحد ما فاقت علي صوت نوارة اللي قالتلها بغيظ :

يا ست الحبيبة ،، هنفضل واجفين اكده ولا ايه عاد 

اتخضت زهرة وضحكت لنوارة ودخلو سوا الفرح 

………………..

عدي كام يوم علي الاحداث اللي حصلت ،،كان فيهم بدر بيحاول دايما يقرب من زهرة وهي كمان كانت سعيدة اوي بده وفي يوم كانت قاعدة نوارة مع فتحية امها وبيتكلمو وزهرة كانت في المطبخ واتكلمت نوارة بضحك :

يا مري ياما لو كان بدر عرف ان زهرة چالها عريس لاه والولية المخبولة كانت بتسألني خيتك دي مخطوبة ولا لاه 

ضحكت فتحية وبعدين ردت بتحذير :

اوعاكي يا نوارة تغلطي بلسانك وتجولي حاچة لاخوكي حاكم انتي خابرة غيرته علي زهرة عاملة كيف 

بلعت نوارة ريقها بخوف وهي شايفة نظرات بدر اللي كلها غضب وهو واقف ورا امها ومنطقتش بكلمة وهو سابهم ودخل بسرعة لزهرة وفتحية اول ما شافت كدة بقت تقول بقلق:

اخوكي اكيد سمع حديتنا ،،ربنا يسترها 

………………..

كانت زهرة بتعمل السلطة ولسة هتقوم اتفاجأت ببدر داخل عليها فابتسمت ولسة هتتكلم اتفاجأت بيه بيشدها من ايديها وبيسحبها وراه فكانت ماشية معاه وهي خايفة احسن يكون عرف بموضوع العريس ده ،، دخل بدر اوضتهم وبعدين ساب ايديها ووقف قدامها وقالها بحد*ة :

انتي ليه مجولتليش عاللي حصل في جاعدة الحريم 

اتأكدت زهرة ان بدر عرف فقالت بتردد:

والله يا بدر ،،كنت هجولك بس نوارة خوفتني انك ممكن تعمل مشكلة وانا 

زعق بدر بغضب وهو بيخب*ط بايديه عالباب فاتنفضت زهرة بخوف :

يعني ايه خوفتي ،، انتي ملكي يا زهرة عارفه يعني ايه ،، انتي حقي وانا مش هتنازل عنك ،، زهرة انا عايز اتمم جوازي منك  

اتصدمت زهرة وقلبها دق ومكنتش عارفة ده خوف ولا فرح ولا ايه بالظبط ،، سكتت ومردتش علي بدر اللي كان باصصلها بقلق وكمل كلامه وقالها وهو بيقرب منها وبيمسك ايديها :

زهرة انا عايز اتوكد انك مش هتهمليني ،، متعاقبنيش علي ذنب مكنش بيدي ،، انتي خابرة اني مكنتش اعرف انك عاشجاني ،،مكنش بيدي لما اتچوزتها ولا كنت اعرف انها بالحقار*ة دي ،، زهرة من يوم ما جولتيلي الحجيجة وانا بندم كل يوم الف مرة اني اخترتها وهملتك ،، من يوميها وانا كل يوم اسأل نفسي انتي بتعاقبيني بمعاملتك دي بس ومش هتهمليني ،، كل يوم بدعي تكوني من نصيبي ومتطلبيش مني اني اطلجك لاني وجتها كانك بتطلبي تاخدي مني روحي ،، انتي بجيتي روحي يا زهرة وعشجتك كاني معشجتش غيرك ،، بكفايا يا زهرة بعاد وخليكي چاري 

كانت زهرة بتسمعه بقلبها ،، كانت طول الوقت مستنية اليوم اللي تحس من ناحيته انه بيحبها بجد ،، مش مجرد بديل ،،ابتسمت زهرة بحب وردت علي بدر بتلقائية :

تفتكر اللي ضحت بسعادتها عشانك زمان وانت مكنتش عاشجها ولا تعرف عنها حاچة ،، هتجدر تهملك دلوك بعد ما سمعت اللي عاشت عمرها كله تحلم تسمع ربعه بس منك ،، مظنش 

ابتسم بدر وهو بيتنهد براحة وضمها وهو بيقول بعشق :

يسلملي نبض جلبك ويخليكي لجلبي يا زهرتي