رواية زواج مع ايقاف التنفيذ الفصل الأول 1 بقلم عادل عبدالله

النهاردة الخميس والوقت قرب علي العشاء .

امي قاعدة قلقانه اوي علي ياسر اخويا .

ياسر اخويا الكبير اكبر مني بسنتين وهو مسافر من يوم الجمعة اللي فاتت مع اصحابه في المصيف والمفروض كان يرجع النهارده العصر زي ما قال البارح في التليفون .

امي بتكلمني بقلق كبير …

: ما تتصل يا نور يا بني بياسر اخوك طمنا عليه .

: ما تقلقيش ياماما عليه زمانه جاي .

: يانور يا بني ده قال البارح انه راجع العصر ومراته كلمتني وانت تحت في الشارع وقالتلي انها اتصلت بيه كتير وتليفونه مقفول .قلبي واكلني عليه .

: ماشي يا ماما هكلمه .وبعدين مدام تليفونه مقفول هكلمه ازاي ؟

: انا مليش دعوة اتصرف يانور .هو مش ده اخوك بردو والمفروض تخاف عليه .

: ياماما ياسر راجل ومتجوز يعني مش عيل صغير علشان اخاف عليه .وعموما هريحك واكلمه .

مسكت الموبايل وحاولت اكلم ياسر لكن تليفونه مقفول .حاولت اكتر من مرة مفيش فايدة .

ودورت علي ارقام اصحاب ياسر واتصلت بواحد منهم ..

: الو ازيك يا علي اخبارك ايه .

: تمام الحمد لله ازيك يا نور اخبارك ايه يا حبيبي .

: الحمد لله .ايه يا عم اتاخرتوا كده ليه ؟

: الجو هنا روعة والواحد مش عاوز يرجع .

: انتو لسه في المصيف ؟

: ايوه .

: طيب معلش اديني ياسر اخويا اكلمه .

: ماشي .خد ياسر معاك اهو .

: ايوه يا نور .عامل ايه يا حبيبي .

: الحمد لله .ايه يا عم ياسر قلقتنا عليك .تليفونك مقفول ومراتك حاولت تكلمك كتير وامك قاعدة قلقانه عليك ومبهدلاني .وانا حاولت اكلمك وقلقت لما لقيت تليفونك مقفول .

: ده نلاقي الموبايل فصل شحن وماخدتش بالي علشان لسه خارجين من البحر .

: طيب ايه يا عم .مش كنت بتقول جاي النهارده العصر ؟

: اه فعلا .بس الجو هنا حلو اووي .اتفقنا نكمل النهارده وبكره نرجع اخر النهار .ايه رايك تعالي قضي معانا بكره وارجع معانا .

: يا عم ده المشوار لوحده يتعب .هسافر علشان يوم واحد ؟؟

: تعالي يا بني الدنيا حلوة اوي هنا . هتندم لو مجتش .

: طب خلاص انا شوية كده واجهز نفسي واجيلك .

قفلت الموبايل مع ياسر وطمنت امي عليه وقلتلها اني هسافر اقضي يوم معاه هو واصحابه وارجع معاهم .

علي الساعة عشرة بالليل اخدت العرببه وسافرت .

وصلت هناك الساعة واحدة بعد نص الليل .لقيتهم قاعدين في الشقة بيلعبوا طاولة واستميشن .

قعدت لعبت معاهم لقرب الساعة تلاته وبعدين نمنا .

صحينا الساعة سبعة الصبح .نزلنا انا وياسر اخويا وعلي وسمير واشرف اصحابه .

روحنا البحر ونزلنا كنا بنلعب ونهزر في الميه قرب الشاطئ لان انا الوحيد فيهم اللي مبعرفش اعوم .وهما محبوش يسيبوني ويدخلوا في البحر جوه .

قعدنا نلعب حوالي ساعتين وبعدين طلعنا جبنا فطار وقعدنا نفطر وشربنا الشاي وبعدين نزلنا البحر تاني .

بصراحه لمة الصحاب كانت حلوة اوي واصحاب اخويا دمهم خفيف .

يوم كان لذيذ فعلا فضلنا لحد قرب العصر في البحر وبعدين فجاة الموج علي اوووي لدرجة اننا كلنا بعدنا عن بعض .

سمعت صوت ياسر اخويا بينادي عليا وانا كنت تقريبا بغرق لاني مقدرتش اقاوم الموج ونزلت تحت في الميه .

حاولت مشربش ميه علشان مغرقش .

كنت سامع صوت ياسر وهو بيكلم اصحابه وكانوا تقريبا كلهم طلعوا من البحر .كان بيصرخ وبيقولهم نور غرق وكان بيصوت وبيقولهم لازم نلاقيه .

واثناء وانا بصارع الموت اني مغرقش لقيت علي صاحب اخويا بيسحبني من رجليا علي بره لحد ما طلعني علي الشاطئ .

طلعت وكنت مش قادر اتكلم ولا حتي اخد نفسي بعد ما شربت شوية مية .

بعد دقايق كنت فوقت من صدمة الغرق .لقيت اصحاب ياسر اخويا بيقولوا هو ياسر فين ؟ ده هو الوحيد اللي مطلعش من الميه .

كلهم جريوا علي البحر ونزلوا يدوروا عليه .

كنت حاسس اني عاجز مش عارف اعمل ايه لأني مبعرفش اعوم .

بقيت بصرخ وانادي علي ياسر بصوت عالي .

الناس بدأت تتلم مع الوقت .وكل ما يعدي وقت اكتر احس ان ياسر مش هيطلع .دموعي تنزل مني وانا بصرخ وانادي عليه .

الناس بقوا يحاولوا يهدوني ولكني كنت مش قادر استوعب اللي انا فيه .

عدا اكتر من نص ساعه او ساعة الا ربع وياسر مخرجش من البحر .

وبعدين بدأ اصحابه يخرجوا من البحر واحد بعد التاني وهما بيبكوا .

مش مصدقين اللي حصل ..

ياسر كان من شوية معانا ودلوقتي مش معانا .

ياسر غرق …ياسر مات …ده ياسر كان احسن واحد فينا بيعوم ….يعني خلاص كده ……مش هنشوفه تاني …..

انهارت انا تماما …….

انا السبب …..ياسر مات علشان كان خايف عليا …..نزل علشان ينقذني مات هو …..

ياريتني ما كنت جيت ….لو مكنتش جيت مكنش خاف عليا ونزل تاني البحر علشان بنقذني ويموت هو .

انا السبب …..ياسر مات بسببي ……مش هسامح نفسي ابدا …..انا مش هقدر اعيش بذنبه ……..لازم امووووت .

جريت علي البحر علشان اغرق نفسي وانا ببكي وبقوله ..انا جايلك يا ياسر …انت موووت علشاني وانا هموووت علشانك ……

الناس اللي واقفين واصحابه جريوا عليا ومسكوني وحاولوا يهدوني ويقولولي وحد الله .طيب يمكن يطلع دلوقتي .ولو مات ده نصيبه .وحد الله واهدي .

قعدت انا واصحابه علي الشاطئ نستناه يطلع من البحر والدموع مش بتبطل .كلنا كنا مصدومين .

وانا اختلط عندي شعور الصدمة بشعور الذنب .

اكتر من مرة احاول ارمي نفسي في البحر ولكن اصحابه يمسكوني .

لما الليل دخل و الوقت اتاخر بينا لقيت تليفونه بيرن ببص لقيت اسم مراته وصورة بنته الوحيدة اللي لسه عندها ست شهور .

بقيت ببكي بحرقه ومش عارف ارد عليها اقولها ايه .

كل شوية تتصل وكمان رقم امي بيتصل .مش عارف هقول لأمي ايه ؟

طيب ارد عليهم اقولهم ايه !!!

اقولهم ياسر مات !!! اقولهم ياسر نزل ينقذني مات هو علشاني !!!!! اقولهم لولا اني جيت مكنش ياسر مات !!!!!اقولهم ان خلاص مراته اترملت وبنته اللي لسه عندها ست شهور اتيتمت .

فضلنا لحد قرب الفجر مش عارفين نرد علي امي ومراته نقولهم ايه .