رواية زواج مع ايقاف التنفيذ الفصل الثاني 2 بقلم عادل عبدالله

فضلنا لحد قرب الفجر مش عارفين نرد علي امي ومراته نقولهم ايه .

اتصلت بخالي وقلتله علي اللي حصل وطلبت منه انه يعرف امي ومرات اخويا ان ياسر غرق .

فضلنا انا واصحاب اخويا لحد الصبح مستنيين ان حد يتصل بينا يعرفونا لو لقوا جثة ياسر .

قبل الضهر بشوية لقيت امي واخواتي محمود وسحر وخالي ومرات اخويا جايين .

اول ما شفتهم امي جريت عليا وحضنتني وبقيت بتبكي وتقولي ياسر اخوك فين يا نور .

كنت منهار تماما وانا في حضنها ومش قادر اتكلم .

امي اغمي عليها وبقينا كلنا بنحاول نفوقها من الغيبوبة .

اخدنا امي علي المستشفي وفضلت معاها اختي سحر في المستشفي .

وانا ومحمود اخويا وخالي واصحاب ياسر بنلف علي الشواطئ نسأل علي ياسر ( قصدي علي جثته ) .

قعدنا حوالي خمس ايام ندور علي ياسر لحد ما اتاكدنا خلاص ان مفيش امل اننا نلاقيه عايش وبقي املنا اننا نلاقي جثته .

رجعنا بيوتنا وكلنا في انهيار وصدمة من غرق ياسر .

وبعد مرور كام يوم اتصلوا بينا وبلغونا انهم لقوا جثة ياسر .

خبيت علي امي واتصلت بخالي قلتله وروحت لخالي علشان اسافر معاه نشوف ونتاكد .

قابلت عند خالي بنته الاء وقعدت معانا لحد ما خالي جهز نفسه علشان نسافر .

نسيت اقول ان الاء بنت خالي هي حب عمري وبنحب بعض من واحنا صغيرين وتقريبا كل العيلة عارفه ودلوقتي احنا علي وشك اننا نتخطب .

خالي اخدني وسافرنا ولما روحنا علشان نتعرف علي الجثة .

اول ما شوفت وش ياسر اغمي عليا علطول .

بعدها لقيت نفسي نايم علي سرير وخالي واقف جنبي وبيفوقوني من للاغماء .

بعد ما فوقت خليت خالي اتصل بأمي بلغها اننا لقينا جثة ياسر واننا راجعيين دلوقتي علشان ندفنه .

خالي انا بعتبره مكان ابويا الله يرحمه لانه حنين اوي وطول عمره وهو قريب مننا خاصة بعد موت والدي حسيت منه بحنان الاب .ده غير انه ابو الاء حب عمري .

خالي طول الطريق واحنا راجعيين وهو بيقولي : لازم تجمد شوية يا نور .مامتك دلوقتي محتجاك تبقي راجل جنبها.

: يا خالي انا مش قادر اسامح نفسي ان انا السبب في موت ياسر .

: يا حبيبي ده قدر واللي حصل مجرد سبب .وبعدين انت مش عملت فيه حاجه علشان تحس بالذنب .

: لكن هو غرق لما نزل البحر يدور عليا بعد ما طلع من البحر .

: وهو انت اللي قلتله انزل ؟

: لا .بس هو نزل علشاني .

: وايه يعني ولو انت مكانه كنت نزلت علشانه .ده احساس الاحوة اللي بينكم ولو اي حد مكانه كان هيعمل كده .

: ربنا يصبرنا يا خالي علي الابتلاء ده .

:ان شاء الله .بس انت اجمد كده وخليك راجل .انت مش صغير يا نور .

رجعنا ودفنا اخويا ياسر ورجعنا علي العزاء .

مر ثلاثة ايام العزاء وانا واقف بين الناس مش شايف حاجه الا صورة ياسر .مرة وهو بيضحك معانا في المية قبل ما يغرق ومرة وانا بتعرف علي جثته .

سامع صوته وهو بيصرخ وبيقول لاصحابه لازم نلاقي نور اخويا .

خلص العزاء وانا تقريبا مش بتكلم خالص .

بعدها حبست نفسي في غرفتي وامتنعت عن الذهاب للشغل .

قعدت في غرفتي وقفلت تليفوني مش بتكلم مع حد ولا عاوز حد يكلمني .

اي حد ييجي يكلمني مش بتكلم معاه خالي ..اخويا محمود ومراته ..سحر اختي ..حتي امي بدات تفوق من صدمتها وتحاول تكلمني وانا برد عليها بالعافية وتقريبا مش فاهم هي بتقولي ايه ولا انا بقولها ايه .

احساسي مكانش صدمة موت ياسر بس كان احساسي بالذنب اكبر وحاسس اني السبب في موته .حتي بعد كلام خالي مش قادر استوعب .

فضلت علي حالتي دي اكتر من شهر حتي بعد ما روحت الشغل مكنتش بكلم حد ولا بسمع حد .

مفيش الا امي اللي كنت بتكلم معاها بسبط .والاء بنت خالي كانت بتكلمني كل يوم بس كنت بتكلم معاها بسيط اوي .

كل ليلة كنت بقوم من النوم مفزوع وبصرخ وانا بنادي علي ياسر .

حتي اصحاب ياسر بقوا ييجي يسلموا علي امي ويطمنوا عليها ويحاولوا يكلموني ويخرجوني من حالتي اللي انا فيها .

اختي سحر راحت قعدت مع مرات اخويا وابنه لان حالتها كانت صعبة جدا من الصدمة .

بعد مرور اكتر من شهرين حالتي اتحسنت الي حد ما .

لما حالتي اتحسنت امي بقيت تروح تقعد مع مرات ياسر يومين وتيجي تقعد معايا يومين .

وبقيت اروح ازورهم والعب مع اسر ابنه كتير .كل لما كنت باخد اسر في حضني كنت بحس بان ياسر اخويا هو اللي في حضني وغصب عني اقعد ابكي .

لحد ما جت امي في يوم كنت بدأت افوق شوية من حالة الحزن وراحت قالتلي : عاوزاك يا نور في حاجة مهمة .

: خير يا امي ؟ انتي تعبانه ولا حاجة ؟

: ايوه في موضوع تاعبني اوي وانت اللي هتريحني فيه .

: لو في ايدي انت بس تحلمي وانا انفذلك احلامك .

: طيب تبقي لازم تلم لحم اخوك .

رديت باستغراب : مش فاهم !!! يعني ايه !!

: يعني يابني مرات اخوك الله يرحمه لسه صغيرة وقدمها المشوار طويل ولازم هتتجوز .

: تتجوز !! هتتجوز بعد ياسر ؟!!!!!

: دي سنة الحياة يابني ومينفعش نطلب منها انها تعيش تربي ابنها من غير ما تتجوز ده يبقي حرام علينا .

: لو عاوزة تتجوز هي حرة .

: طيب ابن اخوك هنسيب راجل غريب يربيه ؟

: لا طبعا .هناخده احنا نربيه .

: يعني عاوز ابن اخوك يعيش يتيم الاب والام ؟

: طب نعمل ايه طيب ؟؟

: تتجوز سهام مرات اخوك وتربي اسر ابنه .

: نعم !!!!! انتي اكيد اتجننتي !!!!!!

: انت بتقول ايه يا نور !!!!!

: انا اسف يا ماما حقك عليا .بس اللي انتي بتقوليه ده مستحيل يحصل .

: لا .هيحصل .اي راجل مكانك لازم يعمل كده .

: انتي عاوزاني انام في سرير اخويا !!!!! ده مش ممكن يحصل ابدا .

: ياحبيبي ياسر اخوك الله يرحمه والحي ابقي من الميت .وانت عمرك ما هتحزن علي ياسر اكتر مني .ده ابني وضنايا .وربنا وحده االي يعلم ان اللي بقولك عليه ده واجع قلبي ازاي بس هو ده الصح واللي لازم يحصل علشان العقل بيقول كده .

:ماما …الموضوع ده مستحيل يحصل ..كلام في الموضوع ده مش عاوز تاني