رواية زواج مع ايقاف التنفيذ الفصل الثالث 3 بقلم عادل عبدالله

:ماما …الموضوع ده مستحيل يحصل ..كلام في الموضوع ده مش عاوز تاني .

مشيت من قدام امي ونزلت اتمشي وانا بفكر ازاي امي تفكر في الموضوع ده ؟

طيب لو امي صممت هعمل ايه ؟ وهتصرف ازاي ؟

روحت بالليل لقيت امي قاعدة صاحية وقالتلي عملت ايه يا نور يا حبيبي ؟

: في ايه يا امي ؟

: في الموضوع اللي قلتلك عليه .

: انا رديت عليكي يا حبيبتي انتي كلامك كله علي راسي وامر علي رقبتي انما الموضوع ده بالذات مستحيل ومش عاوز اتكلم فيه تاني .

: طيب ايه رايك يا نور هتتجوزها يعني هتتجوزها .ولو مسمعتش كلامي مش هعرفك تاني وتحرم عليا ليوم القيامة .

فضلت امي متكلمنيش كذا يوم وانا كمان مش بكلمها علشان اعرفها ان مفيش فايدة .

المفاجاة ان محمود اخويا الكبير بدأ يتكلم انه عاوز يتجوز سهام مرات ياسر بحجة انه يربي ابن اخوه بدل ما حد غريب يربيه .

ولكن الكل رفض بشكل قاطع خصوصا ان مرات محمود لما عرفت سابت البيت وطلبت منه الطلاق .

حاول محمود اخويا اقناع زوجته انه عاوز يتجوز سهام ارملة ياسر علشان يبقي نصيبه مع نصيب ياسر اكبر من نص مصنع البلاستيك بتاعنا واكتر من نص الارض والعمارتين .وان الجوازة دي هتديله حق الادارة في الميراث وهيبقي كل حاجه تحت ايديه .

مرات محمود مش اقتنعت بكلام محمود خصوصا ان سهام ارملة ياسر اجمل منها بكتير وهي كانت بتغير متها .

وان هي كانت عارفة بأن محمود كان معجب بيها من زمان .لكن محدش كان ملاحظ .

امي لما عرفت ان محمود عاوز يتجوز سهام ارملة ياسر عرفت تفكيره ونيته .وخصوصا انها هي اللي مربياه هو وسحر وهما صغيرين .

بعد وفاة والدتهم لما اتجوزت بابا .قبل ما تخلفنا انا وياسر .

زاد اصرار امي اني اتجوز سهام ارملة ياسر وكلمت قرايبنا علشان يقنعوني .

بعدها بقي قرايبي ييجوا يتكلموا معايا ويحاولوا يقنعوني .

اتكلمت مع الاء بنت خالي وعرفتها اللي امي قالته .

وكان رأيها موافق رأيي وقالت اننا لازم نعلن خطوبتنا علشان موضوع جوازي من سهام يتقفل نهائيا .

قررت اني اروح لخالي علشان اطلب ايد الاء .

ولكن قبل ما اكلم خالي اتفاچئت بيه جالي وكلمني في موضوع جوازي من مرات ياسر .

قلتله يا خالي انت عارف ان انا والاء بنحب بعض وانا كنت عاوز اطلب ايديها منك .

خالي قالي يابني في ظروف بتجبرنا نغير كل حاجه في حياتنا .وانت لازم تنفذ كلام والدتك لان هو ده الصح دلوقتي وكلامها عين العقل .ولو انا مكانك كنت هعمل كده .

قلتله طب وحبي لألاء ؟

قالي كل واحد بياخد نصيبه .

كلام خالي حسسني ان انا مهزوم وضعيف واني مش هقدر اقاوم .

لحد ما ابو سهام كلمني بنفسه وقالي ان انه عاوز يجوزني لبنته .وان الظروف هي اللي بتفرض علينا كده .لان جوازنا فيه حماية لاسر ابن اخويا ولسهام بنته في نفس الوقت .

بعدها لقيت امي اخدت هدومها وكل حاجاتها من البيت وراحت قعدت عند مرات ياسر و قالت انها مش هترجع تاني البيت ومش هتعرفني لحد ما تموت لو موافقتش علي كلامها .

حتي الاء نفسها لقيتها بتقول ان باباها قالها انها تحاول تنسي حبها ليا لان الظروف اتغيرت وانها تبدا تبص لمستقبلها بعيد عني .

حسيت من كلام الاء انها كمان بدأت تضعف وتسلم بالظروف .

لقيت نفسي بحارب الكل لوحدي .لحد ما ضعفت واضطريت اني اوافق .

امي فرحت اوي بموافقتي وفي خلال اسبوع امي اشترت الشبكة لسهام .

وفي خلال شهر امي اشتهرت موبيليا جديدة .وقالتلي انها عاوزه تفرحني ومش هتخليني اتجوز علي موبيليا قديمة وانها هتتحمل كل التكاليف .ومش هتخليني اصرف جنية واحد من جيبي .

حددنا ميعاد الدخلة علشان اروح اعيش معاها .

وفي اليوم المحدد طبعا مكانش في فرح ولا حاجه ولكننا اخدنا العيلة كلها وروحنا كتبنا الكتاب في مسجد كبير وبعدين اخدت سهام وروحنا البيت .

بفكر طول الطريق وانا في العربية .طبعا انا مستحيل هلمسها وده قرار اخدته مع نفسي يوم ما وافقت .

لكن انا مش عارف هقولها ازاي .

اول ما دخلنا البيت ناديتها وقلتلها :

: انتي عارفه يا سهام انك من وقت ما اتجوزتي ياسر اخويا الله يرحمه وانا بعتبرك زي اختي .

ونفس الاحساس ده عندي لحد دلوقتي .علشان كده انا هفضل معاكي زي اخوكي .اراعيكي انتي واسر واضلل عليكوا .وده هيبقي سر بينا .

سهام حست باحراج شديد من كلامي وقالتلي تحب تتعشي دلوقتي .

حضرتلي العشا قعدت اتعشيت وهي مرضيتش تتعشي معايا .

قعدنا علي الحال ده اكتر من اسبوع هي مش بتقعد معايا وكل واحد فينا بياكل لوحده وكل واحد بينام في غرفة لوحده .

بعدها راحت سهام عند ماما وجابت اسر ابنها من هناك .

نزلت بعدها الشغل وكنت بحاول اقعد بره البيت اكبر فترة ممكنة ولما كنت برجع البيت كنت بقعد العب مغ اسر ولو هو نايم كنت بقعد لوحدي لحد ما انام .

عدا شهر والتاني وحسيت ان جو البيت كئيب وعلطول سهام قاعدة زعلانه ومهمومه .

قلت احاول اخرجهم علشان نفسيتها ترتاح شوية .

وفي يوم الاجازة قلتلها تعالي نخرج نشم هواء بره شوية .

في الاول كاتت رافضة وبعد اصراري وافقت .

اخدتها هي واسر وخرجنا وقضينا يوم جميل خلانا نخرج من حالة الحزن والكأبة شوية .

وبعد ما كنت مش بتكلم مع سهام الا في اضيق الحدود اتكلمنا وهزرنا وضحكنا كتير .

سهام لما رجعنا افتكرت اني عاوز اغير كلامي معاها .

اتعشينا وبعد العشا قعدت اتفرج علي التليفزيون لقيتها لبست ملابس العرايس وخرجت وقعدت معايا .لكنها كانت قاعدة بعيد عني .

فهمت انها افتكرتني غيرت رائي .قلتلها اني هدخل انام علشان عاوز اروح الشغل بدري بكره .

تاني يوم وانا في الشغل لقيت ماما بتتصل بيا وقالت انها عاوزاني اروح ازورها ضروري النهارده .

رجعت من الشغل عليها لقيتها بتقولي ان سهام راحت وحكت لامها علي اننا مدخلناش لحد دلوقتي واني بعاملها زي اختي .

وان امها اتصلت بيها وقالتلها ان الحياة بالشكل ده مش هينفع تستمر وان سهام حاسة انها مفروضة عليا وانها عاوزه تتطلق .

رديت علي امي اني نفذت طلبها واتجوزتها غصب عني ولكن اكتر من كده مش هينفع لاني حاسس انها لسه مرات اخويا .

لما رجعت البيت لقيت سهام واسر مشيت واخدت هدومها .

كل ده مغيرش حاجه من تفكيري وفضلت عند تصميمي علي رائي .

بعد كام يوم لقيت امي راحت لسهام ورجعتها البيت تاني .

بعد ما رجعت سهام لقيت اسلوبها وطريقتها معايا اتغيرت بشكل نهائي .

بقي حركاتها و كلامها معايا كلها دلع .وغيرت من طريقة لبسها في البيت .وبقيت بتقعد علطول بقمصان نوم وملابس بيت مغرية جدا .