رواية تخاتيخو الفصل السادس 6 بقلم فاطمة طلال

رواية تخاتيخو الفصل السادس 6 بقلم فاطمة طلال

رواية تخاتيخو البارت السادس

رواية تخاتيخو الجزء السادس

رواية تخاتيخو الحلقة السادسة

ويقعد راجح على الكرسي ويقول:
– اسمي راجح عزيز وانتي؟
هبة كانت بتشرب مية واول ما تسمع الاسم تتف في وش راجح من الصدمة وكوباية المية تقع على الارض ’ راجح ينط من مكانه اول ما المية تيجي على وشه ويمسحها من وشه وهو مقروف ويقول:
– ايه القرف ده يا شييييخة!!! ده انتي في الترلالاي خالص!!!!
هبة وهي لسه واقفة متنحة مش قادرة تنطق ولا تتكلم وعمالة تبص على راجح اوي ومبحلقة فيه وتقرب وتبعد زي ما تكون بتدرس ملامحه كويس فراجح يتخض ويقولها:
– في ايه يا انسة مريبة انتي! انتي هتقتليني ولا ايه
هبة بانصعاق:
– اسمك ايه!
راجح ببطىء وخوف واندهاش:
– راجــ ح عز يــ ز !!
– لا!!
– نعم؟!
– لا!! مش معقووول ! يعني لا اااا
– طب ممكن افهم عشان اقدر احدد لا ولا اه ولا ايه في يومنا البطيخ ده!
– لااا!! والله لااا !!
راجح يقرب من هبة وبطريقة تلقائية يلمس جبينها ويقول:
– انتي سخنة يا انسة؟!
هبة تبتسم تلقائي على طريقته وتفتكر زمان لما كان دايما يعملها الحركة دي وتقوله بابتسامة مليانة نوستالجيا:
– يا ترى هبة الدبدوووبة لسه عندك؟!
يبص راجح ليها بنظرة مليانة شوق واستغراب ويرفع حاجبه وكانه بدأ يفهم ويقول:
– هو اللي انا فهمته ده صح!
**********************************************
بعد ساعات من لقاء راجح وهبة ترجع هبة لبيتها ومعاها راجح واول ما تدخل أمل متخدش بالها من انها
معاها حد وتقولها:
– عملتلك يا هبة الاكل ومتخافيش منستش الفرختين اللي طلبتيهم ولا المكرونة ولا السلطة عشان انتي عاملة
دايت ! معرفش دايت ايه ده اللي بتعمليه وشوية وهتقومي تاكليني
هبة وشها يحمر من الاحراج وتقول بسرعة:
– ايه يا ماما ده اكيد انا مش هاكل كل الاكل الكتير ده ياربي عليكي انتي اللي مخلياني كده
تبص الام وتلاقي شاب داخل مع هبة فتصرخ من الدهشة وتقول:
– انحررررفتي يا هبة!
– لا يا ماما ده …..
تقاطعها الام بسرعة:
– مش معنى انك تختوخة يا بنتي تنحرفي اصبري يا بنتي اصبررري ’ الحلال حلووو حتى لو اتأخر بس ده نصيبك هنقووول ايه ……
وتبدا الام بالعياط التمثيلي وتقول:
– تعالى يا مدحت من تربتك شوووف بنتك اللي بقت زي البالونة جايبة شااااااب معاها في عز النهاااار وقدام امهااااااااا يا مدحت .. قدااااااامي يا مدحت بتنحرف !!! ليه وليه عشان صحابها في الشغل بيقولولها تخاتيخووو .. رجلها جرتها للرذيلة يا مدحت.. جرتها خلااااص
راجح فطسان على نفسه من الضحك وهبة كل ما تحاول تتكلم الام تقاطعها..
– يا ماما استني بقى فضحتيني ده راااااجح ابن عمو عزيز وطنط نادين اتقابلنا صدفة وقال انه لازم يشوووفك ..
أمل بصدمة وفرحة في نفس الوقت:
– رااااااجح!! يا حبيبي يا بنيييي كبرت ماشاااء الله
وتجري تحضنه وهو يحضنها ويقولها:
– وحشتيني اووووي يا طنط عاملة ايه يا طنط واخبااااركم ايه
أمل بلهفة:
– اقعد يا حبيبي ارتاااااح اقعد .. اخبار نادين وعزيز ايييه وحشتووووووونا اوووووي .. بجد اخص عليكم
سبتووونا وقلتواااا عدوووولي …
راجح بيضحك ويبص لهبة:
– تقريبا انا عرفت الكلام اللي ورا بعضه ده انتي ورثاه من مين يا هبة
وبعدين يبص لأمل ويقولها:
– ماما الله يرحمها وانا وبابا رجعنا من امريكا من فترة بسيطة والصدفة اللي جمعتني بهبة في شغلها ’ اصل انا بقيت بشتغل معاها في نفس الشركة ..
أمل بحزن وعياط:
– الله يرحمها يااارب .. زعلتني اوووي.. كانت وحشااااني ونفسي اشووووفها اووووووي
وبعددين تستوعب بقية الكلام وتبص بفرحة وتقول:
– بجد هتشتغل مع هبة؟
– اه
– احمدددددك يااااارب والنبي يا بني تحميها من البنات السخيفات اللي هناك اللي كل شوية ……
هبة بمقاطعة سرييعة:
– ماماااااااااا
امل بدون اهتمام:
– كل يوم والله يا بني ترجعلي معيطة من البنات الوحشة اللي هناك اللي بيتريقوا عليها وتعباااني جداااا
في حياتها …
يبتسم راجح ويقول:
– متقلقيش يا طنط هاخد بالي منها
هبة بغيظ وضيق :
– ايه هاخد بالي دي اوعى تكون لسه فاكر اني صغيرة بقى وهتحميني من عيال النادي .. انا كبيرة وعارفة اصرف نفسي اصلا ومحدش له دعوة بيا …
أمل:
– سييبك منها وتعالوا بقى نتغدى
*******************************************
يرجع راجح وهو مليان سعادة للبيت واول ما يشوف عزيز يقوله:
– باابااااااا عارف لقيت ميييين النهاردة ! اقسم بالله مش هتصدق؟!
– مين يا بني؟ لقيت مين ؟
– لقيت هبة وطنط أمل يا باباااااا
– اييييييييه بجد ؟؟؟ ومدددحت عامل ايه ؟ اخبااااره ايه ؟
– للاسف الله يرحمه والله زعلت اوووي اول ما عرفت .. بس اتغديت عندهم وقلتلهم ده بابا هينط من الفرحة اول ما يعرف
– وهبة كبرت ؟ احلوووت ؟؟ بقت عاملة ازاي ها ؟
– ايوة احلوت وبقت زي القمر
– ابقي وديني ليهم يا راجح .. وحشووووني اوووي الناس الطيبة دي !
– حاضر بس كده انت تؤمر يا حلو انت …
ويسيب راجح مدحت يكمل التلفزيون الوسيلة الاكثر صُحبة مع عزيز في الوحدة ودخل اوضته وجري يخرج من مكتبه رسمه هو رسمها لما كان صغير في أمريكا .. رسمة بنوتة صغيرة ماسكة دبدوب وحزينة وقعدة بتلعب بيه .. وابتسم بانشكاح ورجع بذاكرته اول ما هبة قالتله :
– يا ترى هبة الدبدوووبة لسه عندك؟!
– هو اللي انا فهمته ده صح!
– ايوة صح !
– هبة مدحت؟ النادي؟ الدباديب؟
هبة تضحك :
– ههههه ايوة
– يا بنت اللذيناااااااااا .. هههههههه مش معقوووول !! مش مصدق نفسي !
– ولا انا بصراحة بس انت اول ما قلت اسمك انا صعقت! وبعدين اسمك راجح عزيز والاسم نادر فقلت اقلك كلمة السر لو عرفتها يبقى انت هووو واديك طلعت انت !!
– هههههههههه يالهووي على الصدف يا جدعان! انتي عارفة اننا لما رجعنا في اجازة من سنة من السنوات بابا فضل يدور عليكم اد ايه وماما الله يرحمها كمان!! كانوا مضايقين جدا وانا كمان كنت مضايق بس انتي لسه معايا قصدي يعني الدبدوبة هههههه معلش بس المفاجأة صدمتني !
هبة بخجل:
– انا كمان …..
بعدين يتأملها راجح ويتأمل شعرها الكيرلي الاسود الناعم في نفس الوقت وعيونها الواسعة ولونهم العسلي اللي اول ما اشعة اشمس بتيجي عليهم بيكونوا مليانين بنقاء الطبيعة وشفايفها الممتلئة والغمازة اللي في اليمين ويقولها:
– كبرتي واحلويتي
هبة باحراج وعدم ثقة:
– اه وبقيت تختوخة اكتر واكتر! بقيت حاجة شبه البالونة كده
راجح يفهم ان هبة كبرت وكبرت معاها عقدة جسمها وعدم تحكمها في نفسها وفي الاكل فيبتسم بهدوء ويقولها بثقة:
– بس لسه جميلة زي زمان
يحمر وش هبة من الكسوف وتقول :
– وانت لسه بكاش زي زمان
– انا؟! ابدا والله
– احكيلي انت ايه اللي جابك هنا ؟ ورجعتوا كده خلاص من أمريكا ؟
– ااه بابا تعب وقرر يرجع وانا بصراحة مقدرش اسيبه لوحده بس نزلت استقر هنا الاول وبعدين هرجع أمريكا اقفل حاجتي هناك واشوف جينا هتعمل ايه وكده …
– جينا اختك؟!
راجح بضيق:
– لا خطيبتي
هبة بابتسامة خفيفة:
– مبروووك
راجح لنفسه :
“مبروك هه على ايه ! متعرفش الورطة اللي ورطتها لنفسي”
– الله يبارك فيكي وانتي اتخطبتي؟ ولا لسه؟
هبة وهي بتبص لبعيد:
– لا لسه
راجح بابتسامة:
– تماااام
ويفوق راجح من ذكرياته وهو لسه ماسك رسمته لهبة وقرر انه يوريها الرسمة تاني يوم
*******************************************
في الشركة مصطفى قاعد وعينه على هبة كل شوية اللي ملاحظ عليها انها مبتسمة اكتر من المعتاد فبيقوم ويروح ليها :
– صباح الخير يا هبوش
– صباح الخير يا مصطفى ’ معلش يا مصطفى انا مشغولة ومش هقدر اساعدك .. بس مروة هتحب انها تساعدك اوووي .. بلس انا مش عايزة خصم تاني!
يضايق مصطفى ويمشي يروح لمروة ويقولها بغيظ وغضب:
– شفتي اهوووو بغبااااائك ضيعتي عليا فرصة انها تساعدني!! بقيت كل ما اطلب منها تديني وش خشب
مروة بغرور:
– طززز وانت مش نونو يعني مش هتعرف تعمل شغلك!
مصطفى بتوتر:
– لا هعرف اعمله بس لما هي تخلصهولي واستفاد من ذكائها وشطارتها احسن لينا عشان اترقى واقدر
اا اااقدر اتجوزك بسرعة طبعااااا!!
مروة بندم :
– تصدق اه!
مصطفى بتمثيل:
– اتفضلي بقى حااااولي تصلحي اللي انتي عملتيه بقى عشان نقدر نستفيد منهاااااا بأي شكل !
– طيب طيب اهدى يا بيبي الله!
*******************************************
تقوم مروة وهي بتتمختر وتقابل في وشها راجح واول ما تشوفه يسحرها جماله فتقول بدهشة:
– ايه ده انت مين؟!
راجح بعفوية:
– راجح المصمم الجديد اللي هشتغل هنا في الشركة
مروة بفرحة:
– واااااو
– نعم!
– قصدي مبروووك وانا مروة انا بشتغل هنا سيلز وومن ههههههه
راجح بتعجب :
– اهلا بيكي .. عن اذنك
يمشي راجح على مكتبه ومروة تتابعه بنظرات هيمانة وتجري على واحدة تانية اسمها يارا وتقولها:
– ياراااا شفتي الموظف الجديد؟
– لا ! ماله يعني؟!
– يخربييييته قمررررررر
– احلى من مصطفى؟!
– مصطفى اييييييه جمبه بقلك قمرررر ’ صاروووخ ’ جنااااان .. حاجة كده ولا كاظم الساهر في زمانه
– ييييييع هو شبه كاظم!
– يع ايه يا هبلة انتي لا مش شبه كاظم بس تحسيه راجل كده زي كاظم وبعدين كاظم ده عسسسل
– لا مش حلوووو
– طب بيشتغل ايه ؟
– مصمم جرافيك
– يا بنت المحظوظة يا هبة يعني اكتر شغل هيبقى معاها هي ! واحنا فين وفين لما يعبرنا
– هبة دي انا مفروووووسة منها اصلااااا متفكرنيش بيها !! بس اعمل ايه مضطرة اقوم اروحلها
– طيب هو مش المفروض الهبلة دي تعرفه علينا
– صححححح المفرووووض ’ هروح اقولها المتخلفة دي تعرفه علينا
**************************************
مروة تخبط خبطتين وتدخل بسرعة وبكل تمثيل وهي مادة شفايفها لقدام وبدلع :
– هبوووشي
هبة باشمئزاز:
– نعم يا مروة!
– المديرة بتقلك عرفي الموظف الجديد علينا
– كده كده كنت هعمل ده لوحدي .. خلصتي خلاص ؟ اتفضلي بقى لو سمحتي برة عشان اخلص اللي ورايا
مروة في سرها:
“يارب تتفرقعي يا بالونة معفنة جربانة مش لاقية اللي يلمك”
– لا يا روحي خلاص خلصت مع انه كنت ناوية اسألك اخبار الحب ايه معاكي !
هبة بعدم مبالاة:
– حب ايه؟
مروة بشك:
– حبيبك! مش انتي مرتبطة؟!
هبة بتوتر:
– اااه ااه مرتبطة
في نفس الوقت ده كان راجح بيسمع الحوار بين هبة ومروة وهو في قمة استغرابه!
…………….

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية تخاتيخو)